LLAMÁU A CONCEYU
Dende la nueche los tiempos, los nuesos antiguos axuntáronse su los texos pa facer el conceyu abiertu. A tolo lluengo los sieglos, dende'l mesmu cogollu de tolos nuesos puelos y llugares, el vieyu texu foi seña de sabencia y bona vecindá. Símbolu del país, de la xente, el territoriu y el paisax.
Güei, facemos otra vez más un apellíu a conceyu baxo'l Texu d'Abamia, en defensa d'éstos más que centenarios qu'encadarmen un patrimoniu d'incontable valor ecolóxicu, cultural, espiritual, hestóricu, identitariu… magüer que tanto nel monte como nos puelos, ta careciendo un pasmosu amenorgamientu texos ensin que l'alministración se mueye a protexelos dafechu.
Proponemos la aprobación y firma nel conceyu, polos estremaos grupos que ten presentes d'estes piticiones, pa facéyos-les allegar a los medios de comunicación y les alministraciones pertinentes (Conseyeríes de Cultura y Mediu Ambiente) en demanda de proteición pa los nuesos texos y texeos monteses:
Al pie del Texu d'Abamia, aconceyaos los grupos abaxo firmantes, dexisimos al Gobiernu d'Asturies la proteición darréu y dafechu de los texos d'ilesies ya otros solitarios venerables, de tolos nuesos puelos y llugares asina como la de los texeos o texedales monteses que sufren tamién el escayimientu y una amurniante falta d'aniciu.
Desiximos a los responsables de Mediu Ambiente y Cultura de l' Alministración Autonómica, la defensa d'esti patrimoniu y el cumplimientu de los puntos que van darréu:
1º Proteición yá de los texedales monteses, n'especial el del Sueve qu'amuesa tar dañáu pergravemiente, sobre too por mor de l'aición de los herbívoros.
2º Desendolcu de tolos puntos del plan de manexu del texu y llaboría del catálogu xeneral que contempla les normes pa que los texedales o texeos monteses y los texos d'Ilesia ya otros, ten protexios dafechu.
3 Control dafechu de les obres a facer xunto los texos pa torgar la pérdiga d'esti patrimoniu únicu.
Su'l texu d'Abamia, a 1 d'Abril del 2007.
Fecha y sitiu de convocatoria: el 1 d'Abril del 2007 a les 12 del mediudía su'l Texu d'Abamia. Como'l sitiu ta n'obres proponemos que se dexen los coches cau'l campusantu o meyor tovía aparcaos en Corao. De mano la convocatoria ye pa representantes de grupos y asociaciones de tou tipu: culturales, arte, ñatura y ecoloxía... toos aquelos interesaos na proteición del nuesu patrimoniu.
Paezmos que ye meyor que nun vaiga denguna representación de grupos políticos pa que nun haiga enquívocos de dengún tipu.
Convoquen: ANA, Arte Ciudá, Belenos, Amigos del Tejo.
